ڄامڙو، مريد علي: راڳي مريد علي ولد علي بخش ڄامڙي، 1 فبروري 1975ع تي ڳوٺ گل محمد ڄامڙي، ضلعي خيرپورميرس ۾ جنم ورتو. پرائمري تعليم پنهنجي ڳوٺ مان، مئٽرڪ هاءِ اسڪول راڻيپور ۽ ايم. اي (اڪنامڪس) شاهه لطيف يونيورسٽي، خيرپورميرس مان پاس ڪيائين. کيس ڳائڻ جو شوق ننڍي هوندي کان ئي هو. استاد اسڪول ۾ کيس ڳارائيندا هئا. هن جو ڀاءُ ڪريم بخش ’ڪريم‘ به سٺو شاعر هو. هن پهريان محفلن ۾ ڳايو، بعد ۾ 1990ع ڌاري ريڊيو پاڪستان خيرپور تي نوجوانن ۽ شاگردن لاءِ ٿيندڙ پروگرامن ۾ خبرون پڙهڻ لڳو. سندس پهريون ڪلام ناليواري براڊڪاسٽر مختيار ملڪ ’نئين ٽهي‘ پروگرام ۾ رڪارڊ ڪيو. هن نجم علي ۽ برڪت عليءَ کان راڳ جي سکيا به ورتي. 1992ع ڌاري وڌيڪ پڙهڻ لاءِ ڳوٺ ڇڏي ڪراچيءَ ويو، جتي ريڊيي سان لاڳاپجي ويو. ريڊيي تي ڳائڻ سميت ڪمپيئرنگ ۽ انائونسمينٽ ڪيائين. ڪراچيءَ ۾ ايف. ايم 101 تي آڊيو لائبريرين مقرر ٿيو. ايف. ايم تان ’سائل آزاد‘ جو لکيل گيت ’مين رانجها تو هير‘ هن جي آواز ۾ ڏاڍو مقبول ٿيو، جيڪو سندس سڃاڻپ بڻيو. هن پي ٽي وي جي پروگرامن ’روشن تارا‘، ’اڏام‘ ۽ ’ڪچهري‘ پروگرامن ۾ به ڳايو. هن ان کان سواءِ هن ڪشش، ڪي ٽي اين ۽ سنڌ ٽي وي تي به پروگرام ڪيا. هن وقت سنڌيءَ ۽ اردوءَ ۾ ڳائي ٿو. کيس سٺي ڳائڻ تي پاڪستان مسلم ويلفيئر فورم پاران اوارڊ به مليو آهي.
1975.02.01 عيسوي
راڳي مريد علي ولد علي بخش ڄامڙي، 1 فبروري 1975ع تي ڳوٺ گل محمد ڄامڙي، ضلعي خيرپورميرس ۾ جنم ورتو.